អេស្តូនី៖ នាយករដ្ឋមន្រ្តីអេស្តូនី លោកស្រី Kaja Kallas លើកទឹកចិត្តឱ្យលោកខាងលិចព្យាយាមទម្លាក់កេរ្តិ៍ឈ្មោះនូវរាល់ឧបករណ៍សព្វាវុធទាំងឡាយណារបស់រុស្សី ដែលបានប្រើប្រាស់សម្រាប់ការឈ្លានពានទៅលើអ៊ុយក្រែន ដើម្បីបញ្ជៀសនូវការវាយប្រហារណាមួយដែលនឹងអាចកើតមានឡើងបន្ថែមទៀតនាពេលអនាគត។ លោកស្រីនាយករដ្ឋមន្រ្តីអេស្តូនីបានថ្លែងបែបនេះប្រាប់ AFP ក្នុងឱកាសខួបគំរប់មួយឆ្នាំនៃការឈ្លានពានពីសំណាក់រុស្សីមកលើប្រទេសអ៊ុយក្រែន។ 

ថ្លែងពីរដ្ឋធានី Tallinn នៃប្រទេសអេស្តូនី លោកស្រី Kallas បញ្ជាក់ថា យើងគួរតែរួមដៃគ្នាដែលធ្វើយ៉ាងណាឱ្យការឈ្លានពាននេះខូចខាតប្រយោជន៍ឱ្យច្រើនបំផុតតាមដែលអាចធ្វើទៅបានចំពោះរុស្សី។ ប្រសិន​បើការឈ្លានពាននៅអ៊ុយក្រែននេះពិតជាទទួលបានលទ្ធផល ​ប្រាកដណាស់ថាឧបករណ៍សព្វាវុធទាំងនេះនឹងអាចយកទៅប្រើប្រាស់នៅកន្លែងផ្សេងៗទៀត។ 

គួរបញ្ជាក់ថា ប្រទេសអេស្តូនីគឺជាប្រទេសដែលធ្លាប់ស្ថិតក្រោមសហភាពសូវៀត បច្ចុប្បន្នគឺជាប្រទេសដែលជាសមាជិក NATO និងជាសមាជិកសហភាពអឺរ៉ុបដែលមានព្រំដែនជាប់ប្រទេសរុស្សី។ ប្រទេសតូចមួយនេះបានប្រកាសគាំទ្រយ៉ាងពេញទំហឹងនៅខាងអ៊ុយក្រែនតាំងពីថ្ងៃដែលសង្គ្រាមផ្ទុះឡើងដំបូង និងបានអំពាវនាវម្តងហើយម្តងទៀតឱ្យបណ្តាប្រទេសជាសម្ព័ន្ធមិត្តផ្តល់ការគាំទ្រទៅកាន់អ៊ុយក្រែន។ 

អេស្តូនី មានប្រជាជនប្រមាណជា ១,៣លាននាក់ប៉ុណ្ណោះ ប៉ុន្តែប្រទេសនេះបានផ្តល់ការគាំទ្រខ្លាំងក្លាបំផុតចំពោះអ៊ុយក្រែន ដោយកញ្ចប់់ជំនួយប្រមាណមួយឆ្នាំកន្លងទៅនេះមានទំហំទឹកប្រាក់លើសពី ១ភាគរយនៃទំហំ GDP សរុបរបស់ខ្លួន។ នៅពេលត្រូវបានសួរអំពីការជ្រើសរើសរវាងការបញ្ជូនជំនួយទៅអ៊ុយក្រែន និងកសាងកម្លាំងការពារប្រទេសរបស់ខ្លួន លោកស្រីបានជ្រើសរើសយកការការពារចាប់ផ្តើមដោយអ៊ុយក្រែន។ លោកស្រីធ្លាប់បានលើកឡើងថា៖"ប្រសិនបើពួកគេ (អ៊ុយក្រែន) បន្តប្រយុទ្ធនៅទីនោះ មានន័យថាយើង ក៏ដូចជាពួកគេកំពុងធ្វើឱ្យសត្រូវរួមរបស់យើងធ្លាក់ចុះខ្សោយ"៕